Hamon

ni Monching Damasing

Hindi ako nagsusulat dahil sa pag-ibig. Walang pag-ibig sa pagsusulat. Hindi pag-ibig ang umuudyok sa pagsusulat kundi kamatayan. Habilin ang akda.

Hindi ako nagsusulat dahil sa pag-ibig. Nagsusulat ako dahil may salita, at mangingibig ako ng salita. Hindi pag-ibig ang pag-ibig ng salita. Hindi ito pagsinta. Nagsusulat ako dahil hindi kagandahan ang kagandahan, at ito'y maganda.

Lumalakbay ang kagandahan sa panahon, tangan ang mga pilat ng kasaysayan. (Nagkalat ang kagandahan sa bakas ng mga abuhing gusali't mga punongkahoy na naaambunan ng abo ng pabrika.) At salita'y pagbabalik-tanaw. Isang pagbabalik-tanaw ang kagandahan.

Isang pagninilay-nilay ang kagandahan. Walang katawan ang kagandahan. Hindi ako nagsusulat dahil sa isang katawan, kundi dahil may maganda ang hubog ng katawan. Hindi ako mangingibig ng katawan, kundi tagapagsalaysay ng kasaysayan ng hubog at ang kadiliman ng mata't buhok.

Nagsusulat ako dahil may hagod ang bawat salita sa aking isip. Nagsusulat ako dahil napakahiwaga ng salitang "bakas." Hindi pa ako handa. Hindi ako handa kaya ako tumutula. At hanggang pagbabalik-tanaw lamang ang aking mga tula. Dito ako naka-ugat.

Dito naka-ugat ang mundo, subalit, di gaya ng mundo, matagal ko nang naiwan ang pag-asa. Paglalahad ang tanda ng pagyabong, pagyabong mula sa nakaraan at hindi magaang paglalaro lamang.

Umaasa akong sa bawat tangka ko ng pagtula'y makababalik ako sa nakaraang umudyok sa aking sumambit. Makababalik sa sandaling winasak ko ang bingit at sumambit. Sumasambit ako ngayon.

Isang pagninilay-nilay at paglakbay ang pagtula. Paglakbay sa saysay ng nakaraan. Paglakbay sa pagyabong ng mundo. Pagbaybay sa karanasan ang tawag dito. Pagbaybay sa karanasan ng katawan ng mundo't lupa.

Ikaw, bakit ka ba nagsusulat?

Kabanata Dos

ni Nicko Caluya

Wansapanataym, sa tabing ilog

Basta’t kasama kita hanggang sa dulo
ng walang hanggan, habang may buhay
pangako sa’yo may bukas pa
tayong dalawa! Sana’y wala nang wakas!

Abangan ang susunod na kabanata!

Iisa pa lamang, bituing walang ningning
(Hiram kahit isang saglit,
mga anghel na walang langit!
Natutulog ba ang Diyos?)
Sana maulit muli, pangarap na bituin,
ikaw ang lahat sa akin!

Eto na ang susunod na kabanata!

Dahil may isang ikaw, tanging yaman
darating ang umaga
sa sandaling kailangan mo ako.

Magandang tanghali!

Kay tagal kang hinintay!
Maging sino ka man:
Mara Clara, Esperanza, Eva Fonda,
Dyosa, Marina, Rubi, I love Betty La Fea!
Mula sa puso, walang kapalit

Home Along Da Riles, Alas Singko y Medya

Magkano ang iyong dangal?
Palimos ng pag-ibig!

Mangarap ka!
Lumang piso para sa puso.

overpass

ni Paolo Tiausas

malayo ang pagitan
ng dalawang babaan
sa isang overpass.

kanina lamang, pilit kitang hinahanap
sa puwang ng mga hakbang
ng inaakyat kong hagdan.

nakatawid at nakababa na ako
bago ka matagpuan
sa dakong pinanggalingan.

nagtaka pa ako kung bakit
walang tawiran.

habang buháy ang kalyeng namamagitan
sa ating dalawa, laging may maiiwang
ako sa kabila.

Pagtanggap

ni Monching Damasing

Kuyom niya ang basang lupa.
Mata’y minamasdan ang sinasandalang
akasya, mga sangang umaahon, humihinga
sa ulang lumalakas. Marahan,

dumadaloy ang mga salita
sa pisngi, sa bába, pumapatak
sa lupa. Sinusubok niyang limutin
ang lahat, itakwil ang katawan.

Subalit walang alinlangang nagpapahampas
ang mga talbos. At patuloy sa pagparaya
sa mga ulap ang mga sangang yumuyukod.
Kahit mga kuliglig na sinusuklian ng kulog

ang pagbulong ng bugtong.
”Hanggang dito nalang,” palahaw ng isip.
Subalit mata’y kumakapit sa matayog
na katawan ng punong sinasalo ang ula’t

kinakanlong ang kalungkutan,
mga pisngi ng daho’y nalalahiran
ng mithi. Wala siyang ibang mailanghap
kundi alaala. Naalimpungatan

sa salita, pinalis niya ang lupa’t
iniangat ang mga kamay
sa langit, hinayaang likumin
ng mga gusgusing palad

ang mga luha ng nunong mundo.

Be One of the 10 Fellows of the 16th Ateneo Heights Writers Workshop

Heights, the official artistic and literary publication and organization of the Ateneo De Manila University, now accepts applications for the 16th Ateneo Heights Writers Workshop, to be held in Antipolo City, Rizal from July 30-August 1, 2010.

The workshop is open to all current college students and beginning writers of the Ateneo De Manila.

Applicants should send a manuscript of: 5 poems/ tula, OR 2 short stories/ maikling kuwento, OR 2 non-fiction/ essay pieces/ sanaysay. The application should be accompanied with the author's name, year and course, and contact details (cellphone number and email address).

Entries in English and Filipino may be submitted. Fellowships are awarded by genre and by language.

Heights covers board and lodging, food, workshop kits, and provides transportation from and back to Ateneo for the selected writing fellows.

Submit applications on or before July 9, 2010 to josephcasimiro_13@yahoo.com. Please write "workshop" on the subject line of the email.

For further details, please send inquiries to josephcasimiro_13@yahoo.com.

Or visit http://heights-ateneo.org/workshop/.

Teleserye

ni Monching Damasing


Nahulog sa lababo
Ang singsing na may puso.
Iniahon sa guho,
Iyong ulong naabo.

Ibang Klase

ni Ali Sangalang


Shit,


'Yung "Shet" niya,


"Xet"